2. 7. 2018: Русаля, русаля, мама впекли паля – вчера был  Лемківскій Пікнік в Йонкерсі

Русаля, русаля, мама впекли паля – тото народне пословя та інчы подібны загостят серед участників Лемківского Пікніку, котрий америцкы Русины зорґанізовали 1. липця/юлия 2018 р. як «русальний» пікнік, точно стрічу русиньской еміґрациі.

Тогорічны Русаля – Ден Святой Тройці (Сошествіє Святого Духа), выходили уж перше, але Карпаторусиньскій Америцкій Центр «Лемко Голь» подію повязану з тым праздником прирыхтовал  на початок липця/юля.

Традиция Лемківскых Пікніків сігат часів, коли побудували Лемко Голь. Тоты пікнікы были барз великы. Приходили на них не лем люде з околиці, але тіж нашы Руснакы з Пенсильваніі, ачий Канады – бесідує Андрий Медвід, орґанізатор пікніку і єден з діячів реактивуваного Лемко Голю.

Купета люди на тото приходила, но лем коли продали Лемко Голь, то вшытко перестало істнувати. Мы тото тепер уж од добрых парох років хочеме оновити і покус нам іде. Спочатку было тяжко, мало люди приходило, але влони было нас спокійні більше як 100 люди. Давны діячы Лемко Голю орґанізували тот пікнік все на Русаля, но мы не годны зробити тото все товды, коли Русаля проходят – продолжал А. Медвід.

Лемківскій Пікнік то нагода на стрічу родаків, еміґрантів, а часто уж лем потомных тых, котры пішли глядати ліпшого жытя в Америці. На подіі буде мож посмакувати лемківскы стравы, поспівати ай пограти в футболь ци волейболь. Деталі чытайте на залученым афішы.

 

Севериян КОСОВСКЫЙ

(Публікуєме в оріґіналї – лемківскім варіантї русиньского языка.)